Бөгөн Ағиҙел йылғаһы яры буйында “Хеҙмәт ҡаһарманлығы ҡалаһы” стелаһы асылды. Ул Бөйөк Ватан һуғышы йылдарында тыл хеҙмәтсәндәренең батырлығын мәңгеләштереү маҡсатында ҡуйылды. “Стела армия ҡеүәтен нығытыуҙа ярҙам иткән кешеләргә хөрмәт билдәһе”, - тине Республика Башлығы Радий Хәбиров.
“Башҡортостанда, Өфөлә йәшәүебеҙ менән ғорурланырға тейешбеҙ. Йәштәр ҡалабыҙҙың ил өсөн нимә эшләгәнен белергә тейеш”, - ти Республика халыҡтары ассамблеяһы советы рәйесе Зөһрә Рәхмәтуллина.
2020 йылда Рәсәй Президенты ҡарары менән Өфөгә “Хеҙмәт ҡаһарманлығы ҡалаһы” исеме бирелде.
