Киләһе йыл июлдә Ишембай районында экологик яҡтан хәүефһеҙ техноген тупраҡ етештерелә башлай. Органик серетмә ярҙамында полигондарҙы һәм карьерҙарҙы рекультивациялау ҡарала. Бынан тыш, «Эко-Сити» комплексында Стәрлетамаҡтың ғәмәлдәге технологияһы миҫалында SRF-яғыулыҡ етештереү проекты әҙерләнә.
Альтернатив яғыулыҡ менән цемент етештереүҙә ҡулланылған газды алмаштырырға мөмкин. Белгестәр билдәләүенсә, уның калорияһы юғары, был производствоға сығымдарҙы һәм атмосфераға углекислый газ сығарыуҙы, шулай уҡ иҡтисадтың ҡиммәтерәк энергия сығанаҡтарына бәйлелеген кәметергә мөмкинлек бирәсәк. Ике башланғыс та өҫтөнлөклө инвестиция проекттар исемлегенә ингән.
Сүп-сарҙы сорттарға бүлеү комплексы йылына 200 мең тонна ҡалдыҡ ҡабул итеү ҡеүәтенә эйә. Уға 600 миллион һум инвестиция һалынған. Әле бында Ишембай һәм Стәрлетамаҡ ҡалаларынан, эргә-тирәләге райондарҙан ҡаты көнкүреш ҡалдыҡтары килтерелә.
