13 тонна эсәр һыу, йылы кейемдәр һәм уҡыу әсбаптары. Бөгөн Луганск халыҡ республикаһына Башҡортостан халҡы гуманитар ярҙам оҙатты. Республика ҡатын-ҡыҙҙар союзы етем балаларға 100 мең һумлыҡ йылы кейемдәр, аяҡ кейемдәре әҙерләгән. Шулай уҡ уҡыу өсөн кәрәкле мәктәп әйберҙәре алынған. Башҡортостандың һәр районынан тиерлек ҡатын-ҡыҙҙар йылы бирсәткә, ойоҡбаштар бәйләп ебәргән.
Гуманитар ярҙамды хәрби бәрелештәр берлеге рәйесе, йәмәғәт палатаһы вәкиле Тимерйән Рәжәпов оҙатып бара. Мобилизацияланыусы ир-егеттәргә тәғәйенләнгән УАЗ автомобиле, шулай уҡ эсәр һыу таңда юлға сыҡҡан. Етемдәр өсөн йылы кейем, ойоҡбаштар, көндәлек кәрәк-яраҡтары тейәгән машина бөгөн юлға сыға. Луганск халыҡ республикаһына йөктө оҙатып барыусылар тәғәйен ярҙамды таратҡас, бер аҙнанан әйләнеп ҡайтырға ниәтләй.
