Быны аграрийҙар көҙгө ямғырҙар һәм һаҡлау урындарының етешмәүе менән аңлата. Был турала ауыл хужалығы министры Илшат Фәзрахманов белдерҙе. Һуңғы арала социаль селтәрҙәрҙә ҡар аҫтында ҡалған уңыш фотолары арта башланы. Ведомство етәксеһе әйтеүенсә, яңы уңыш асыҡ һауала ҡалмаясаҡ.
Дыуан районында уҙған төбәк кәңәшмәһендә ауыл хужалығы ведомствоһы алдында ашлыҡты һаҡлау һәм уға хаҡты тотоу бурысы тороуы билдәләнде. Бойҙайға хаҡ киләһе йылдан артыр тип көтөлә. Малсылыҡ продукцияһына әле үк хаҡтар күтәрелә башлаған. Илшат Фәзрахманов әйтеүенсә, әле һөттөң килограмы 32 һум менән баһалана. Был күләм Европалағы хаҡтарға ҡарағанда ла юғары. Шуға күрә малсылыҡты үҫтереү отошло буласаҡ.
