Бөгөн Дәүләт Йыйылышы–Ҡоролтайға мөрәжәғәтнәмәһендә Радий Хәбиров республикаға һалынған инвестицияларҙы кәметмәҫкә ҡушты. Башҡортостан илдең инвестиция рейтингында тәүге баҫҡыстарҙа торған биш төбәк араһына инә. “Беҙҙең команда бер ишектәр ябылһа, икенсе мөмкинлектәр эҙләй”, - тине Радий Хәбиров.
Радий Хәбиров бөгөнгө сығышында ла инвесторҙарҙы “Алға” биләмәһенә саҡырҙы. Әлегә унда буш ер участкалары булыуы тураһында әйтте. Былтыр республиканың тышҡы сауҙа әйләнеше – 28, быйыл туғыҙ айҙа – 13 ярым процентҡа артҡан. “Сеймал түгел, әҙер продукция һатып алған илдәр күбәйә”, - тине республика етәксеһе. Башҡортостан Беларусь менән иҡтисади, гуманитар өлкәлә хеҙмәттәшлекте киңәйтә. Киләһе йылда Өфөлә Рәсәй һәм Беларусь төбәктәре форумы ойошторола. “Хөкүмәт унынсы конгресҡа әҙерләнергә һәм уны лайыҡлы үткәрергә тейеш”, - тине Радий Хәбиров.
