2023 йылға ҡабул ителгән республика бюджеты сығымдары 285 миллиард 138 миллион һум тәшкил итәсәк, өстән ике өлөшө социаль йүнәлешле. Улар тулы күләмдә финансланасаҡ. Был турала Башҡортостан Хөкүмәте Премьер-министры урынбаҫары - финанс министры Лира Иғтисамова БСТ каналында ойошторолған брифингта белдерҙе. Бюджет өлкәһе хеҙмәткәрҙәренә эш хаҡы, район-ҡалаларҙың инфраструктура үҫешенә бәйле статьяларҙы финанслау артҡан. Шулай уҡ һаулыҡ һаҡлау, мәғариф, мәҙәниәт, спорт өлкәләре лә иғтибар үҙәгендә.
Республика башлығы Указына ярашлы, Махсус хәрби операцияла ҡатнашыусыларға һәм уларҙың ғаиләләренә ҡабул ителгән утыҙҙан ашыу ярҙам сараһының унауһы мәғариф өлкәһенә ҡағыла. Ведомство етәксеһе Айбулат Хажин билдәләүенсә, балалар баҡсалары тәрбиәләнеүселәре, мәктәп һәм колледждарҙа белем алыусыларға бушлай туҡланыу ойошторолған. Балаларҙың йәйге ялын ойоштороу мәсьәләһе лә контролгә алынған.
