Ишембайҙа урындағы косметологҡа мөрәжәғәт итеүсе бер нисә ҡатын-ҡыҙҙың зыян күреү осрағы буйынса енәйәт эше ҡуҙғатылған. «Бьюти Стар» студияһында битендәге һырҙарҙы тигеҙләргә теләгән гүзәл заттар өсөн процедура күңелһеҙ тамамлана. Матур йөҙ урынына улар һытҡы, таптар менән ҡаплана, тиреләренең һиҙгерлеге арта. Уларҙың хәле менән БЮТ хәбәрселәре ҡыҙыҡһынды.
Биттәге һытҡылар, таптар һәм йоҡарған бит тиреһе - лазер йоғонтоһо эҙемтәһеҙ ҡалмай. Был гүзәл зат өсөн матур, һырһыҙ йөҙ тураһындағы хыял район үҙәгендәге матурлыҡ студияһына барғандан һуң, селпәрәмә килә. Күңелһеҙ эҙемтәләрҙе суд экспертизаһы ла раҫлай.
Әлеге ваҡытта Светлана дауалауға рөхсәте булған косметология клиникаһында дауаланыу үтә. Күңелһеҙ тәжрибәнән һуң ул бындай ойошмаларҙы айырыуса һаҡлыҡ менән һайлай. Ханым билдәләүенсә, бит тиреһе зыян күргәс, һәр процедура ғазапҡа тиң.
Светланана башҡа, Ишембай ҡалаһындағы салонда кәмендә өс ҡатын-ҡыҙ зыян күргән. Әйткәндәй, «Бьюти Стар» адресы буйынса теркәлмәгән. Интернет селтәрендә ойошманың косметология хеҙмәте күрһәтеү тураһында рәсми мәғлүмәт тә юҡ. Студияның законға ярашлы эшмәкәрлек алып барыуы шикле.
Сифатһыҙ косметолог хеҙмәттәре һирәк осрамаһа ла, компенсация алыусылар күп түгел. Ишембайҙағы осраҡ буйынса енәйәт эше ҡуҙғатылған. Зыян күреүселәр ғәҙеллектең еңеп сығырына ышана.
Рәзилә Ғиниәтуллина
