Башҡортостан башлығы Радий Хәбиров ил Президенты Владимир Путин ҡуйған үҫеш маҡсаттарына ирешеү - өҫтөнлөклө эш тип билдәләне. Төбәк етәксеһе уҙған аҙнаға йомғаҡ яһап, яңы бурыстарҙы барланы. Һаулыҡ һаҡлау министрына ашығыс медицина ярҙамының эшен камиллаштырыу буйынса тәҡдимдәр индереү өсөн бер аҙна ваҡыт бирелде. Ултырышта уҡытыусы һәм остаз йылы сиктәрендә саралар ойоштороу, керәшен һыуыҡтарына мәкеләрҙе әҙерләү, хәрби бурысын башҡарған ир-егеттәрҙең ғаиләләренә ярҙам күрһәтеү юлдары һәм башҡа һорауҙар ҡаралды. Тулыраҡ мәғлүмәт БЮТ хәбәрсеһе Флорида Ким яҙмаһында .
Уҙған аҙнала Башҡортрстанға килгәндә Рәсәй Президенты Владимир Путин республиканың социал-иҡтисади үҫеш темптарын юғары баһаланы. Оператив кәңәшмәлә Радий Хәбиров белдереүенсә, маҡсат - артабан да күрһәтелгән ышанысты аҡлау өсөн эшләү.
Республикала ашығыс медицина ярҙамы эшмәкәрлеген камиллаштырыу көнүҙәк талаптарҙың береһе булып тора. Һаулыҡ һаҡлау министры аҙна дауамында ошоға ҡағылышлы тәҡдимдәр әҙер буласағын белдерҙе. Шул уҡ ваҡытта төбәктә коронавирус инфекцияһы менән сирләүселәр һаны кәмеүе күҙәтелә.
Кәңәшмәлә Радий Хәбиров сатлама һыуыҡтар осоронда күп кенә биләмәләрҙә электр энергияһы өҙөклөктәр килеп тыуыуын һәм ошоға бәйле йорттарҙың йылыһыҙ ҡалыуын да тәнҡит утына тотто. Ошонда уҡ мәсьәләне хәл итеү юлдары ҡаралды.
Ултырышта шулай уҡ Рәсәйҙә иғлан ителгән «Уҡытыусы һәм остаз « йылы сиктәрендә ойошторолған күләмле саралар планы билдәләнде Төбәк район-ҡалаларында фәнни-ғәмәли конференция, август кәңәшмәһе, форум, күргәҙмә , уҡыуҙар һәм спорт ярыштары исемлеге теркәлде. Ауыл хужалығы өлкәһенә килгәндә, һөтсөлөк тармағын киңәйтеү өсөн ярҙам сараларын көсәйтеү күҙаллана. Республика һөт етештереү буйынса илдә бишенсе урында иҫәпләнә һәм был күрһәткестәрҙе артабан да яҡшыртыу бурысы ҡуйылды.
Оператив кәңәшмәлә махсус хәрби операцияла ҡатнашыусылар менән бәйле һорауҙар ҙа иғтибар үҙәгенә ҡуйылды. Өлөшләтә мобилизацияға саҡырылыусыларға ярҙам күрһәтеү һәм бәйләнеште координациялауға булышлыҡ итеү бурысы махсус хәрби операция зонаһына юлланған Башҡортостан Хөкүмәте Премьер-министрының беренсе урынбаҫары Азат Бадрановҡа йөкмәтелгән.
Флорида Ким
