Республикала махсус хәрби операцияла ҡатнашыусы ир-егеттәрҙең ғаиләләренә ярҙам сараларын ойоштороу дауам итә. Башҡортостан Хөкүмәте Премьер-министры урынбаҫары, Финанс министры Лира Иғтисамова хәбәр итеүенсә төбәктә ноябрҙән 2615 малай-ҡыҙ балалар баҡсаһына бушлай йөрөй башлаған, 1173 бала түңәрәктәргә ҡабул ителгән. Хәрбиҙәрҙең яҡындарына «Ғаилә» социаль үҙәге хеҙмәткәрҙәре 3 меңгә яҡын консультация үткәреп, меңләп кешегә психологик ярҙам күрһәткән.
Ипотека түләү менән ҡатмарлыҡтар кисергән ғаиләләргә кредит каникулы ҡаралған. Төбәктә 90 кеше түләүҙәр ваҡытын кисектереүҙе һораған һәм бөтә мөрәжәғәттәр ыңғай хәл ителгән. Махсус хәрби операцияла ҡатнашыусыларҙың өлкән йәштәге ата-әсәләренә көндәлек тормошта ярҙам ойошторолған. Хәрбиҙәргә ҡаралған 20 мең һум түләүҙәр һәр бер һалдатҡа үҙ ваҡытында түләнеп бөткән.
