Махсус хәрби операцияла ҡатнашыусы һалдат ярты йыл дауамында мәктәп уҡыусыһынан алған сәләмде һаҡлап йөрөп Башҡортостанға ҡайтып хат авторы менән танышты.
Миңлеғәле Шайморатов исемендәге батальон һалдаты, «Шах» хәрби ҡушаматлы яугир Өфө районы Дмитриевка ауылындағы мәктәптә уҡыусы Элина Ҡәнәфиеваның йылы теләктәре, рухи ярҙам биргән һүҙҙәре өсөн рәхмәт һүҙҙәрен еткерҙе. Махсус хәрби операцияла ҡатнашыусы әйтеүенсә, яҡташтар, балалар яҙып ебәргән хаттар ауыр минуттарҙа алға этәргес булып торған ҙур ярҙам булып тора. Мәктәп уҡыусылары һалдаттарға тағы ла хат яҙырға ниәтләнә.
Махсус хәрби операцияла ҡатнашыусы һалдат мәктәптә өлкән класс уҡыусылары менән аралашып уларҙың һорауҙарына яуап бирҙе. Быға тиклем дә ҡыҙыу нөктәләрҙә ҡатнашҡан хәрби күптән түгел 50 йәшлек юбилейын билдәләгән. Уның тыуған көнө Донбасстағы ҡаты бәрелештәрҙең береһендә үткән.
