Дәүләт Йыйылышы - Ҡоролтай рәйесе Константин Толкачев етәкселегендәге рәсми делегация Белоруссияның Гомель өлкәһендә булды. Башҡортостан вәкилдәре Беларусь Республикаһының иң ҡеүәтле төбәктәренең береһе булған өлкәнең 85 йыллығына арналған тантаналарҙа ҡатнашты, шулай уҡ урындағы закондар сығарыу һәм башҡарма власть органдары вәкилдәре менән эшлекле осрашыуҙар уҙғарҙы, сәнәғәт предприятиелары һәм мәҙәни учреждениелар эшмәкәрлеге менән танышты.
Рәсми осрашыуҙар барышында яҡтар парламент-ара хеҙмәттәшлекте нығытыу мәсьәләләре буйынса фекер алышты. Башҡортостан парламенты етәксеһе Гомель өлкәһенең депутаттар Советы ҡарамағына ике яҡлы хеҙмәттәшлек тураһында килешеү проектын тәҡдим итте. Рәсми документҡа быйыл йәй, Өфөлә үтәсәк «Рәсәй төбәктәре һәм Беларусь» 10-сы халыҡ-ара форумында ҡул ҡуйыу күҙаллана.
