Башҡортостан башлығы республиканың беренсе Президенты Мортаза Рәхимовтың исемен мәңгеләштереү тураһындағы Указға ҡул ҡуйҙы. Документҡа ярашлы, уның исеме 3-сө республика башҡорт гимназияһына һәм Мораҡ башҡорт гимназияһына бирелә. Бынан тыш, хөкүмәткә республика мәғариф учреждениеһына, ә Өфө ҡалаһы хакимиәтенә үҙәк урамдарҙың береһенә Мортаза Рәхимовтың исемен биреү тураһында тәҡдим әҙерләү бурысы ҡуйыла.
Өфөлә беренсе Президентҡа һәйкәл, йәшәгән йортонда таҡтаташ, тыуған ауылы Тәүәкәндә йорт-музейы асыла. Башҡортостандың Милли музейына Башҡортостандың беренсе Президентының эшмәкәрлегенә ҡағылышлы фонд материалдары әҙерләргә, Мортаза Ғөбәйҙулла улының 90 йыллығына биография энциклопедияһын баҫтырырға ҡушыла.
