Йәш ҡотҡарыусы. Өфөлә 14 йәшлек уҡыусы мәктәптән ҡайтып килгәндә күп фатирлы йортта сыҡҡан янғынды үҙаллы һүндергән. Торлаҡ хужаһы уттан ҡотҡарған егеткә оло рәхмәтле. Ҡыйыу аҙымға барған Валерий Медведков менән БЮТ ижади төркөмө осрашты.
Торлаҡтың алтынсы ҡаты тотош төтөн эсендә була. Дәрестән ҡайтып килгән Валерий Медведков ишек алдында юғалып ҡалған күрше ҡатынды күреп ҡала. Оло йәштәге ханым үҙенең аш бүлмәһендә янғын сығыуын хәбәр итә. Егет күп уйлап тормай, ут эсенә ташлана.
Был ваҡиға өс аҙна элек теркәлгән. Бәлә ваҡытында Рәлиә Еникеева өйҙә яңғыҙы булған, табала май ҡыҙҙырған. Күрәһең, утта оҙаҡ тотҡан. Һауыт яна башлай, уға һыу һибеү хәлде тағы ла ҡатмарлаштыра. Ҡатын күрше фатирҙа йәшәгән егеттең ярҙамға килеүенә оло рәхмәтле, ысын геройға тиңләй.
Янғын һүндереүселәр ҙә йәш ҡотҡарыусыға рәхмәт һүҙҙәрен еткергән. Ысынлап та, ут сыҡҡан майҙан ҙур була. Аш-һыу бүлмәһенән тыш, юғары температуранан коридор ҙа зыян күргән. Был кадрҙар янғындан һуң төшөрөлгән. Тарттырылған түшәм тулыһынса ирей. Рәлиә Еникеева билдәләүенсә, әгәр ваҡытында ярҙам күрһәтелмәгән булһа, ут тотош фатирҙы ла ялмап алыр ине. Шуға ҡатын Ғәҙәттән тыш хәлдәр министрлығының Башҡортостан буйынса баш идаралығына хат яҙып, Валерий Медведковҡа тейешле награда биреүҙе һораған.
Гөлназ Хәйбуллина
