Алты йәштән алып туҡһан йәшкә тиклем йөҙҙән ашыу шахматсыны йыйған бәйге 2-се балалар-үҫмерҙәр спорт комплексында үтте. Интеллектуаль ярыш махсус хәрби операцияла батырҙарса һәләк булған яҡташтар исеменә арналды. Әйткәндәй, турнирҙа ҡатнашыусыларҙы хәрби бәрелештә һәләк булған офицер, Стәрлетамаҡ егете Олег Тамашовтың атаһы - Закир Йомабай улы сәләмләне.
Ойоштороусылар билдәләүенсә, сара шахматта иң-иңдәрҙе асыҡлау өсөн генә түгел, ә йәш быуында тыуған илгә һәм уны һаҡлаусыларына ихтирам һәм ғорурлыҡ тойғоһо тәрбиәләү маҡсатында уҙғарылды. Уйын аҙағында еңеүселәрҙе Миңлеғәле Шайморатов исемендәге батальон яугиры бүләкләне.
