Республикала “Ватан” отряды булдырылды. Әле яугирҙәр туплана. Өфөлә махсус хәрби операция биләмәһенә юлланасаҡ ир-егеттәр менән осрашыу үтте. “беҙ патриоттар. Ватан һағына баҫыу изге бурысыбыҙ”, - ти Ейәнсура районынан Иҫән ҡушаматлы яугир. Ул быға тиклем Доставалов батальонында хеҙмәт иткән.
“Ватан” отрядын “Самурай” ҡушаматлы командир етәкләй. “Ир-егеттәр алғы һыҙыҡҡа барғанға тиклем хәрби әҙерлек үтә. Улар бөтә кәрәк-яраҡтар менән тәьмин ителә”, - тине ул.
“Бөгөн йәмғиәттә Еңеүгә өлөш индерергә теләгәндәр арта. Ир-егеттәребеҙ үҙ теләге менән батальондарға яҙыла”. Социология фәндәре кандидаты Илгиз Солтанморатов шундай фекерҙә. Ул махсус хәрби операцияла ҡатнашып ҡайтҡан доброволец. “Республикала ойошторолған ике батальонға һәм “Ватан” отряды сафына баҫырға теләгәндәр күп”, - ти ул.
“Ватан” отрядына 60 йәшкә тиклемге ир-егеттәр алына. Башҡортостанда тағы ла ике ирекле батальон ойошторола. Бөйөк Ватан һуғышы ҡаһарманы, легендар “Ҡара генерал” Даян Мурзин исемендәге хәрби берләшмәгә 50 йәштән өлкәндәр алына. “Төньяҡ Амурҙары”на 50 йәшкә тиклемге ир-егеттәр ҡабул ителә.
