Ул ирекле батальон һалдаттары һәм мобилизацияланғандарға тәғәйенләнә. “Ватан һағына баҫҡан ир-егеттәребеҙ өсөн иң кәрәкле әйберҙәр тупланды”, - ти Баймаҡ районы Темәс ауыл хакимиәте башлығы Айгөл Байрамғолова. Ул ылауҙы Донбасҡа тиклем оҙатып бара.
Гуманитар ылау Ҡырымдың Рәсәйгә ҡушылыуына 9 йыл тулыуға арнала. “Бөгөн ошо йылдағы иң ҙур конвойҙарҙың береһен оҙатабыҙ. Уны туплауҙа райондар әүҙем ҡатнашты”, - ти Башҡортостан Ғәҙәттән тыш хәлдәр буйынса дәүләт комитеты рәйесе Фәрит Ғүмәров.
Башҡортостандан Донбасҡа ебәрелгән әлеге гуманитар ылау иҫәбе буйынса 22-сеһе булды. Уны оҙатыу сараһы барышында фиҙаҡәр водителдәргә Маҡтау ҡағыҙы һәм Рәхмәт хаттары тапшырылды.
