Киләсәктә ойошма етештереү күләмен арттырып, сифатлы продукция менән Рәсәй төбәктәрен дә тәьмин итергә ниәтләй. Бөгөн республика хужалыҡтары алдында ла ошондай мөмкинлектәр асыла. Башҡортостандың тышҡы иҡтисади бәйләнештәр һәм конгресс эшмәкәрлеге министрлығы белгестәре менән берлектә Экспортҡа ярҙам үҙәге хеҙмәткәрҙәре эш сәфәре менән республика предприятиеларында булып, консультация үткәрә. Өфө районында уҙған бизнес һәм дәүләт вәкилдәре менән осрашыу һөҙөмтәләре тураһында БЮТ ижади төркөмө репортажы.
Тигеҙ рәт менән шифалы эсемлек тулы шешәләр ҡойоу аппараты буйлап хәрәкәт итә. Махсус ҡоролма ҡымыҙҙы шешәләргә тултыра, киләһе аппаратта уларҙың ҡапҡастары ябыла. Процесс аҙағында шешәләр полиэтиленға төрөлөп, һатыуға әҙерләнә. Эш барышын 3 кеше күҙәтә. Ошондай ҡымыҙ ҡойоу аппараты Рәсәйҙә берәү генә, уны предприятие үҙе уйлап сығарған.
Хужалыҡ файҙалы эсемлекте башлыса экспортҡа, Ҡаҙағстанға оҙата. Әле цехта ҡымыҙҙы етештереү күләме тәүлегенә 5 тоннанан арта. Киләсәктә хужалыҡ экспортҡа етештерелгән продукция күләмен арттырырға, тәүлегенә 10 тоннаға еткерергә, шулай уҡ файҙалы эсемлекте Рәсәй төбәктәренә лә һатыуға ебәрергә ниәтләй.
Ҡымыҙ етештерүсе ойошма экспортты яйға һалһа, «Урал байлыҡтары» ауыл хужалығы кооперативы был турала хыяллана ғына. 4 йыл элек барлыҡҡа килгән кооператив бер нисә йүнәлештә эшләй - йылҡы һәм ҡош-ҡорт үрсетеү, үҫемселек менән шөғөлләнә. Продукцияны етештереү күләмен арттырырға теләк һәм мөмкинлектәр бар, әммә уны һатыу мәсьәләһе киҫкен тора.
Проект 2019 йылдан башлап эшләй, ул экспортҡа ориентирланған предприятиеларҙы асыҡлау һәм уларға ярҙам итеүҙе күҙ уңында тота. Үҙәк ошо осорҙа 200-ҙән ашыу предприятие эше менән танышҡан
«Урал байлыҡтары» кооперативы осрашыуҙан һуң оҙаҡ һаҡлана торған ит консерваларын күберәк етештерергә, ауыл хужалығы культураларын сәсеү алдынан сит илдәрҙең баҙар һорауын ентекле өйрәнергә ҡарар итте.
Лилиә Мәҡсүтова
