Һирәк осрай торған сир билдәләре 13-сө ҡала клиник дауаханаһындағы үҙәкләштерелгән клиника- диагностика лабораторияһында асыҡланған. Башҡортостан лабораторияларының һөҙөмтәле эшмәкәрлеге тураһында БЮТ хәбәрсеһе Рәмилә Исмәғилева.
Ул көндө Марина Юрьевна һөйәк елеген микроскоп аша тикшергәндә ғәҙәти булмаған күренешкә тап була. Быға тиклем бер тапҡыр ҙа ундай картинаны осратмағанға, Ҡыуатов исемендәге республика клиник дауаханаһының тәжрибәле табиптары менән кәңәшләшә.
35 йәшлек егет 13-сө ҡала клиник дауаханаһында былтыр февралдән бирле дауаланған. Ауыр хәлдәге пациентҡа тәүҙә диагноз ҡуйыу ҡатмарлыҡ тыуҙырған. Лаборатор тикшереү һөҙөмтәһе уның организмы паразиттар менән зарарланғанын күрһәткәндән һуң ул республика йоғошло сирҙәр дауаханаһына йүнәлтелгән.
Ҡыуатов исемендәге республика клиник дауаханаһының лабораторияһы ла сирҙе дәлилләй. Илле йылдан ашыу лабораторияла эшләгән Любовь Демкина микроскоп быялаһында лейшманиоз сире билдәләрен бығаса бер тапҡыр ҙа осратмаған.
Лейшманиоз - протозой инфекциялар төркөмөнә инә. Ул кешенең тәненә ҡыҙыл таптар булып сыға, эске органдарын зарарлай. Лейшманиялар тән күҙәнәге эсендә үрсей. Ауырыу ғәҙәттә, Урта Азия, Кавказ арты яғында осрай. Кешегә төлкө, бүре һымаҡ хайуандарҙан йоға. Йәнлектәрҙән кешегә уны серәкәйҙәр күсереүе ихтимал. Инкубация ваҡыты 20 көндән 9 йылға тиклем.
Һирәк осрай торған сирҙән егет йоғошло сирҙәр дауаханаһында дауаланған. Белгестәр әйтеүенсә, уға антибиотиктар һәм башҡа препараттар менән дауалау үткәрелгән. Кире осраҡта сир аҙайып пациент иҫән ҡалыуы икеле, ти табиптар. Лаборанттарҙың ентекле эшенең һөҙөмтәһе- ҡотҡарылып ҡалған тотош бер ғүмер.
Рәмилә Исмәғилева
