Операция ярҙамында пациенттың иң төп органдарының береһе тулыһынса тиерлек тергеҙелгән. БЮТ хәбәрсеһе Рәзилә Ғиниәтуллина дауам итә.
37 йәшлек ир пациент бүлмәһенә килеп эләгерен уйлап та бирмәгәндер. Быға тиклем йөрәге сәғәт һымаҡ эшләгән уҙаман сәләмәт тормош рәүеше алып бара, насар ғәҙәттәре булмай. Ҡотҡарыусы булып эшкә урынлашырға теләп, медицина тикшеренеүе үткән саҡта йөрәгендә аневризма булыуы асыҡлана. Бәләкәй генә лә түгел, ә 12 сантиметр. Белгестәр әйтеүенсә, бындай ҙурлыҡтағы патология менән ирҙең тере ҡалыуы мөғжизәгә тиң.
6 сәғәттән ашыу кардиология үҙәге белгестәре ирҙең ғүмере өсөн көрәшә. Аневризма йөрәктең күп өлөшөн зарарлап өлгөрә. Табиптар органды тулыһынса тиерлек тергеҙә. Аневризма алып ташлана, зарарланған йөрәк клапаны имплантҡа алмаштырыла.
Был операцияның һуңғы этабы - йөрәккә клапан ҡуйылған, табиптар пациенттың күкрәк ситлеген тегә. Әмәлиәттән һуң, пациент реанимацияға оҙатыла. Яҡынса 2-3 көн ул белгестәр ҡарауы аҫтында буласаҡ.
Белгестәр әйтеүенсә, аневризма менән яфаланыусылар йылдан-йыл арта. Республика кардиология үҙәге табиптарына аҙна һайын тиерлек ошондай әмәлиәттәр үткәрергә тура килә. Операция өҫтәленә өлкән йәштәгеләр генә түгел, йәштәр ҙә килеп эләгә.
Йөрәк аортаһы аневризмаһы менән яфаланалыусылар исемлегенә инмәҫ өсөн, пациенттарға бер нисә талапты үтәү зарур. Артериаль ҡан баҫымын даими рәүештә үлсәү, күкрәк ауыртыуын инҡар итмәү, файҙалы туҡланыу, сәләмәт тормош алып барыу мөһим. Ә инде геройыбыҙ Юрий оҙаҡламай дауахананан сығарыласаҡ. Ҡотҡарыусы булыу теләге тормошҡа ашмаһа ла, уның ғүмерен ҡотҡарған табиптарға ул рәхмәтле.
Рәзилә Ғиниәтуллина
