Ике көн даумында үтәсәк сарала Рәсәй төбәктәренән 45 юғары квалификациялы белгес , шул иҫәптән Ҡаҙағстан вәкилдәре лә ҡатнаша. Фекер алышыу барышында Башҡорт дәүләт медицина университеты клиникаһында йыуан эсәккә әмәлиәт яһау мәлен тура эфирҙа өйрәнеү мөмкинлеге лә булдырылды. Үҙенсәлекле операцияны БЮТ хәбәрсеһе Гүзәл Борханова күҙәтте.
Әмәлиәт өҫтәле артында Алексей Москалев. Ул меңәрләгән пациенттарға йыуан эсәкте зарарлаған ауыр сирҙәрҙән ҡотолорға ярҙам итә. Александр Наумович Рыжих исемендәге милли медицина тикшеренеүҙәре үҙәге онкология бүлеге һәм йыуан эсәк хирургияһы табип-колопроктологы, медицина фәндәре кандидаты Алексей Москалевтың йыуан эсәкккә башҡарған әмәлиәт барышы онлайн форматта күрһәтелде.
Йыуан эсәктә яман шеш менән бәйле һаулыҡ ҡаҡшауы быға тиклем өлкән быуын вәкилдәрендә йышыраҡ күҙәтелһә, хәҙер урта йәштәгеләрҙә лә бындай осраҡтар йыш ҡабатлана, ти белгестәр.
Яман шеш менән яфаланған 67 йәшлек пациент йыуан эсәгенә әмәлиәт лапроскопик ысул менән үтәлде. Әмәлиәт бер-нисә этапта башҡарыласаҡ. Тәүгеһендә эсәк уң яҡтан тышҡа сығарыласаҡ.
Әмлиәт барышында йыуан эсәктәге ике йоҙроҡ ҙурлығындағы яман шеш киҫеп алынды. Пациентҡа ваҡытлыса стома ҡуйылды.
Колопроктология буйынса төбәк-ара форум Рәсәйҙең иң яҡшы табиптарын бер майҙанға йыйҙы. Йыуан эсәк, тура эсәктәге яман шеш эҙемтәләре лә йыш ҡына эсәктән стома сығарыуға сәбәп булып тора. Медицина белгестәре форумда бындай ауырыуҙарҙы социаль реабилитациялау, тиҙерәк аяҡҡа баҫтырыу мәсьәләләрен дә барланы.
Гүзәл Борханова
