Ирекмәндәр заявка буйынса халыҡтан ҡаты тормош-көнкүреш ҡалдыҡтарын алдан һөйләшелгән адрес буйынса килеп ала. Тормош-көнкүреш ҡалдыҡтарын тапшырып йыйылған аҡса фармацевтик һыуытҡыс һатып алыуға йүнәлтеләсәк.
Көндәлек тормошта тупланған ҡалдыҡтарҙы ирекмәндәр төп эштәренән һуң буш ваҡыттарында шәхси автомобилдәрендә йыя. Бындай кәрәкле һәм йәмғиәт өсөн файҙалы эшкә Динә Хәмзина ла ҡушылған. Экологик акция ярҙамында тормош- көнкүреш ҡалдыҡтарын төрлө фракцияларға бүлеп, уларҙы икенсе ҡулланыуға ебәреүҙән тыш, яман шеш менән интегеүселәргә лә ярҙам ҡулы һуҙыла.
«Сүп-сар тапшырып, ғүмер бүләк итәбеҙ».Тап ошондай саҡырыу менән Ләйсән Зайцева үҙенең хәйриә проектын булдырған. Өфө хосписына ярҙам итергә теләгән ирекмәндәрҙе ул социаль селтәрҙәр аша тапҡан. Ул изгелек һәм мәрхәмәтлек проектына ҡушылған водителдәр автомобилдәрен бушлай заправкалай. Хосписта дарыуҙар һаҡлау өсөн һыуытҡыс һатып алыу өсөн аҡсаның шаҡтай өлөшө йыйылған.
