Был турала Өфөлә уҙған осрашыуҙа һүҙ барҙы. Делегацияны Тажикстан ҡарамағындағы туризм үҫеше буйынса комитет рәйесе Камолиддин Муминзод етәкләй. Үҙәк Азия ҡунаҡтары Башҡортостанға тиклем Рәсәйҙең бер нисә төбәгендә булған, улар илдең туризм ҡеүттәре менән танышырға, ике яҡ араһында ошо өлкәлә бәйләнештәрҙе нығытырға ниәтләй. Шулай уҡ сауҙа-иҡтисади мөнәсәбәттәрен дә киңәйтеү күҙаллана.
Әле Башҡортостан менән Тажикстан араһындағы тауар әйләнеше 60 миллион доллар, әммә был күрһәткесте бер нисә тапҡырға арттырырға мөмкин. Осрашыуҙа ике республиканың да туризм ҡеүәтенә арналған презентация күрһәтелде, туристик операторҙар араһында хеҙмәттәшлек килешеүҙәренә ҡул ҡуйылды.
