Өфөлә 16 йәшлек ҡыҙҙың хыялы тормошҡа ашты. Юлиә машинист кабинаһында йөрөп ҡарарға теләгән. Уның теләген «Башҡортостан ҡала яны пассажирҙар компанияһы» «Хыялыңды тормошҡа ашыр» акцияһы сиктәрендә үтәне. БЮТ хәбәрсеһе Әлфинә Килдейәрова дауам итә.
Машинистың кабинаһынан инеү менән тиҫтәләгән һорау. Ниндәй тиҙлектә йөрөргә мөмкин, ҡайҙа баҫырға һәм, ниһайәт, нисә минуттан ҡуҙғалабыҙ. Тәгәрмәстәр тауышы аҫтында, тәҙрә аша баҫыу-урмандар, бәләкәй һәм ҙур станцияларҙы күҙәтеү — Юлиәнең күптәнге хыялы. Быға тиклем бер ҡасан да поезда йөрөгәнем булманы, ти ул. Ә машинист кабинаһына инеп, «Ҡарлуғас» электропоезы менән идара итеп ҡарау кисә генә тормошҡа ашмаҫлыҡ теләк булған.
16 йәшлек Юлиәнең киләһе хыялы — машинист һөнәренә уҡып сығыу. Тәү ҡарашҡа уны ҡатын-ҡыҙҙарға хас булмаған һөнәр булыуы ла ҡурҡытмай.
Йыл башынан алып «Ҡарлуғас» тар 218 меңдән ашыу кешене хеҙмәтләндергән. Был электропоездарҙың ихтыяж менән файҙаланыуын аңлата.
Әлеге ваҡытта «Ҡарлуғас» электропоезының 6-шар вагондан торған 3 составы йөрөй. Улар 14 ҡала яны маршрутын, шулай уҡ Өфө агломерацияһын хеҙмәтләндерә. Бында буфет, вай-фай сервистары һәм балалар мөйөшө кеүек өҫтәмә уңайлыҡтар ҙа булдырылған.
Әлфинә Килдейәрова
