Ошо төбәктә йәшәгән, тыуып-үҫкән яҡташтар бер күрешеп һөйләшергә, күңел асырға ғына түгел, шиғыр тыңларға тип тә йыйылды. Тулыраҡ киләһе яҙмала.
Ауылдаштар байрамы һәр ҡайҙа үтә, бындайы - тик Һарышта. Был юлы һарыштарҙы бер майҙанға шиғриәт йыйҙы. Башҡортостандың халыҡ шағиры Гөлфиә Юнысова ошо ауылдан, Дим һыуын һыулап, Дим тулҡындарында балыҡтай йөҙөп үҫкән. Матур юбилейы уңайынан ауылдаштары менән шиғриәт, йыр-бейеү телендә аралашты әҙибә.
Гөлфиә Юнысова шиғырҙарын йәше-ҡарты яттан белә. Сөнки улар йырлап тора, тиҙ хәтерҙә ҡала, ябай тел менән тәрән мәғәнә бирә. Шуға бик күптәре көйгә һалынған. Иң мөһиме - был шиғыр-йырҙар күңелдәрҙе яҡтылыҡ, сафлыҡ, өмөт менән һуғара. Оҙаҡ йылдар журналистика йөгөн тартҡан, «Башҡортостан ҡыҙы» журналын етәкләгән, Дәүләт Йыйылышы-Ҡоролтайҙа, РСФСР Юғары Советында халыҡ мәнфәғәттәрен яҡлаған дәүләт һәм йәмәғәт эшәмәкәре бер ваҡытта ла тыуған еренән айырылмай, ябай, ихлас, йомарт булып ҡала.
Быйыл Гөлфиә Юнысова өсөн юбилей йылы, сентябрҙә 75 йәшен билдәләй ул. Был дата - шиғриәт һөйөүселәр, халыҡ менән осрашыу өсөн бер сәбәп кенә. Саралар Өфөлә, район-ҡалаларҙа инде үтте һәм үтәсәк. Төрлө заманда ла халыҡ әҙип һүҙенә, аҡыллы фекергә, ышаныс-өмөт уятырлыҡ кәңәшкә мохтаж.
Донъяға ҡараш позитив булырға тейеш. Кәйефһеҙлеккә төшөп йөрөһәң, кеше еңеп сыға алмай ауырлыҡтарҙы һәм башҡаларға ла терәк була алмай.
Ил-йортҡа һынауҙар килгәндә шағир һүҙенең баһаһы арта. Гөлфиә Аҙнағол ҡыҙы Юнысова өсөн дә халыҡ менән аралашыу - илһам алыу, ижадҡа түл туплау ғына түгел, тәү сиратта шағирлыҡ бурысын атҡарыу.
Рәйсә Абдуллина
