Августың һуңғы көндәрендә сауҙа үҙәктәрендәге иң үтемле тауар мәктәп кәрәк-яраҡтары. Ата-әсәләр ғаилә бюджетын планлаштырып малай-ҡыҙҙарҙы уҡыу йылына әҙерләй. Мәктәп тауарҙарына хаҡтар нисек? Тулыраҡ мәғлүмәт БЮТ хәбәрсеһе Флорида Ким яҙмаһында.
Уҡыу йылы башланырға һанаулы көндәр ҡалды. Сауҙа үҙәктәрендә мәктәп йәрминкәләре гөрләй. Күлдәк, костюм-салбарҙар, кәнсә тауарҙарына ихтыяж артҡан осор. Һатыусылар әйтеүенсә, хаҡтар уҙған йыл хаҡтары менән бер сама.
Баланы мәктәпкә әҙерләү ғаилә бюджетының август айындағы мөһим өлөшө. Ата-әсәләр әйберҙең сифатын, фасонын, етештереү төбәген иҫәпкә алып ғәзиз балалары өсөн финанс мөмкинлектәренә ҡарап тырыша.
Мәктәп тауарҙарының сифатына килгәндә белгестәр кейем-һалым етен, кашемир, йөн туҡымаларҙан булырға тейеш тип билдәләй. Тирләтмәгән һәм шыумаған аяҡ кейеме кәңәш ителә.
Рәсәй статистика хеҙмәте мәғлүмәтенә ярашлы, быйыл мәктәпкә малайҙы әҙерләү өсөн 22 , ҡыҙ баланы йыйыу өсөн 27 мең һум самаһы аҡса тотонола. Мәктәп кәрәк-яраҡтары хаҡы быйыл 7 процентҡа артҡан һәм 13 мең һум тәшкил итә. Өфөлә ойошторолған мәктәп йәрминкәләре үҙ эшен август аҙағына тиклем дауам итә.
Флорида Ким
