1888 йылдың 8 сентябрендә Кинель-Өфө тимер юл линияһы файҙаланыуға тапшырыла. Нәҡ ошо көндө асылған Ағиҙел тимер юл күпере аша тәүге паровоз үтеп, баш ҡала вокзалына туҡтай. Тимер юл хәрәкәте асылыуы төбәктең иҡтисади һәм мәҙәни үҫешенә ҙур этәргес була.
Бөгөн Башҡортостан тимер юл транспорты илдә пассажир һәм йөк ташыу буйынса алдынғы урында. 2023 йылдың тәүге яртыһында республикала пассажирҙар ағымы миллиондан ашҡан. Төбәктә етештерелгән продукция тимер юлдары аша Төркиә, Ҡаҙағстан һәм башҡа илдәргә сығарыла. Юбилейлы дата Өфө тимер юл вокзалында ла билдәләнде. Йәйгеһен поездарҙа проводник булып эшләгән Рәсәй студенттары отряды вәкилдәренә Маҡтау ҡағыҙҙары тапшырылды.
