Мәғариф учреждениелары яңырыу кисерә, «Сәләмәтлек» милли проекты сиктәрендә һаулыҡ һаҡлау өлкәһендә лә ҙур төҙөлөштәр йәйелдерелгән. Райондың социаль үҫешенә ыңғай йоғонто яһаясаҡ обьекттар менән БЮТ хәбәрсеһе Гүзәл Борханова таныштыра.
Дыуан районы үҙәге Мәсәғүттә сменаһына 200 пациентты ҡабул итә торған балалар поликлиникаһы төҙөлөшө әүҙем бара. Әлеге ваҡытта өс ҡатлы бинаның фасады йылытыла, эске ремонт-биҙәү эштәре башҡарыла. Обьект йыл аҙағына файҙаланыуға тапшырыласаҡ .Белем көнөнә капиталь ремонттан һуң Рухтин ауылындағы урта мәктәп ишектәрен асҡан. Мәғариф учреждениеһында йылытыу , электр, һыу тәьминәте, елләтеү системаһы тулыһынса яңыртылған. Уҡыу кабинеттары яңы мебель һәм ҡорамалдар менән йыһазландырылған. Капиталь ремонт федераль проект сиктәрендә үткәрелгән.
Күпер төҙөлөшөнә 60 миллион һумдан ашыу аҡса йүнләтелгән. Кошелевка йылғаһы 1200 халыҡ ғүмер иткән Михайловка ауылының ҡап уртаһынан аға. Быға тиклем халыҡ арғы яҡҡа эшкә , уҡыусылар мәктәпкә авария хәлендәге иҫке күпер аша йөрөргә мәжбүр булған. Яңы күперҙең файҙаланыуға тапшрылыуы Михайловкала йәшәүселәрҙең тормошон бермә-бер еңеләйтәсәк, тип күҙаллана.
Капиталь күперҙең ныҡлығын еңел автомобилдәрҙә беренсе булып үтеүсе водителдәр үҙҙәре лә һынап ҡараны.
Ярты быуат элек йылға аша ағас күперҙән «Вечный зов» фильмы геройы Кафтанов тарантаста елдереп үткән. Тарихи күпер йылдар үтеү менән туҙған.Соҡорҙар хасил булып авария хәленә еткән. Күпер аша хәрәкәтләнеү ғүмер өсөн хәүефле булған.
Михайловка ауылы аша яңы күпер ауылдың ике ярын ғына түгел, ә кешеләрҙең йөрәктәрен тоташтырыусы дуҫлыҡ күпере буласаҡ.Төбәктә быуаттар дауамында башҡорт, татар, рус, мордва берҙәм һәм татыу ғүмер итә.
Ике ярҙы тоташтырыусы күпер Михайловка ауылы халҡына арғы яҡҡа эшкә йөрөргә, ә урман ауылдарына район үҙәгенә йөрөү мөмкинлеге бирәсәк. Бынан тыш заманса социаль обьект туризмды үҫтереүгә лә ҙур мөмкинлектәр аса.
Гүзәл Борханова
