Эш сәфәре сиктәрендә ул Башҡортостан Башлығы Радий Хәбиров менән осрашты.
Был Мехмет Сансарҙың һуңғы эш сәфәре, ул Рәсәйҙәге 5 йыллыҡ дипломатик миссияһын тамамлай. Илсе даими ярҙамы өсөн Республика етәкселегенә рәхмәт белдерҙе. Минең тәүге командировкам да тап Өфөгә булғайны, һөҙөмтәле хеҙмәттәшлек иттек. Радий Хәбировтың башланғысы менән Истамбулда Башҡортостан вәкиллеге асылды. Ә Өфөлә Төркиәнең Почетлы консулы эш башланы, тине Мехмет Сансар.
Башҡортостан башлығы үҙ сиратында, Рәсәй-төрөк мөнсәббәтәрен нығытыуға тос өлөш индергән өсөн илсегә рәхмәт белдерҙе. Тауар әйләнеше арта, социаль-иҡтисади өлкәлә хеҙмәттәшлекте нығытырға мөмкинлектәр күп, тине Радий Фәрит улы. Күптән түгел, Өфөлә Төркиәнең крандар етештереү компанияһын асырға килешелгән. Шулай уҡ Башҡортостан эшҡыуарҙары эш сәфәре менән Төркиәгә барырға ниәтләй.
