Биология институты хеҙмәткәре бер нисә йыл дауамында «Азолен» юғары сифатлы һәм универсаль биоашлама өҫтөндә эшләгән. Асыш Рәсәй биләмәһендә рөхсәт ителгән агрохимикаттар һәм пестицидтар дәүләт каталогына индерелгән. Хәҙер уны илдең 18 төбәге аграрийҙары үҙ баҫыуҙарында ҡуллана. Биоашлама эшләү процесы менән БЮТ хәбәрсеһе Әлфинә Килдейәрова танышты.
Пробиркала буласаҡ ауыл хужалығы ашламаһы әҙерләнә. Ғалимдар йәшәүгә һәләтле күҙәнәктәрҙе асыҡлау өсөн шыйыҡсалағы бактерияларҙы үрсетә. Уларҙы Петри сынаяғына күсергәндән һуң 3-5 тәүлеккә термостатҡа ҡуйырға кәрәк.
Ашлама әҙерләүҙең икенсе этабы агробиология лабораторияһында башлана. Ферментёр йәки микроорганизмдарҙы туҡлыҡлы мөхиттә үҫтереүсе аппаратта тоҙ, азот һәм углерод сығанаҡтары буласаҡ ашлама шыйыҡсаһы менән иҙелә. Культивация 2 көндән алып 5 көнгә тиклем дауам итә.
Биотехнологиялар лабораторияһында ауыл хужалығы культураларын үҫтереү өсөн ашлама әҙерләү эше 2004 йылда уҡ башлана. Мәсетле районының һөрөлгән баҫыуынан үҫентеләрҙә барлыҡҡа килгән төрлө ауырыуҙарға ҡаршы тора алырлыҡ микроорганизм табыла. Уның нигеҙендә «Азолен» биоашламаһы уйлап сығарыла.
Биоашлама Рәсәй биләмәһендә рөхсәт ителгән агрохимикаттар һәм пестицидтар дәүләт каталогына индерелә. Уны эшләү технологияһы лицензияһын илдең 18 тәбәге һатып алған.
«Азолен» биоашламаһына лицензия һатып алған һәр төбәк техник шарттар менән таныша, әҙер продукция сығарғанға тиклем һынауҙарҙа беҙҙең ғалимдар ҡатнаша. Биология институты бының менән генә туҡтамай. Ғалимдар ҡоролоҡ шарттарында мул уңыш алыу өсөн яңы ашлама өҫтөндә эшләй башлаған.
Әлфинә Килдейәрова
