Стәрлетамаҡта 3Д-принтер ярҙамында гранаталарҙы теүәл ташлау ҡулайламалары етештерелә. Әлегә «ҡанаттарҙың» тәүге партияһы махсус хәрби операция биләмәһендә үҙен яҡшы һынатҡан. Пластиктан етештерелгән бәләкәй деталдәрҙең ҡайҙа һәм нисек ҡулланылыуы тураһында киләһе яҙмала.
Пилотһыҙ осоусы аппаратҡа гранатаның ике муляжы ҡуйылған. Уларҙы ташлағанда пластик ҡанаттарҙың булыуы мөһим, һауала әйләнмәй, ҡуйылған сәпкә теүәл осорға ярҙам итә. Стәрлетамаҡтан Юрий Орда менән Александр Кузнецов махсус хәрби операцияла ҡатнашыусыларҙың ҡоралланыуын нығытыу өҫтөндә эшләй. 3д принтерҙа гранатаны ташлау механизмының корпусы баҫтырыла. Һәр бер ҡулайлама һынау үтә.
Әлегә махсус хәрби операция биләмәһенә ВОГ-17, ВОГ-25 гранаталары өсөн ҡанаттар оҙатылған. Хәрби припастарҙы ташлау ҡулайламаһын сираттағы партия менән ебәреү ҡаралған. Кәрәк-яраҡтар 3Д-принтерҙа баҫтырыла. Үҙенә күрә оҙайлы процесс. Фронт продукцияһының бер детален эшләү өсөн генә өсәр-дүртәр сәғәт ваҡыт талап ителә.
Хәрбиҙәргә махсус продукция етештереү өсөн бушлай бина бүленгән, бында эш тәүлек әйләнәһенә, хатта, ял көндәрендә лә ойошторолған.
Александр Кузьменко производство ҡеүәтен арттырыу маҡсатында өсөнсө 3д принтер һатып алырға йыйына. Хәрбиҙәргә ярҙамға яңы техник ҡулайлама моделдәре өҫтөндә эшләй. Медицина йүнәлеше лә өҫтөнлөклө. Ампула - дарыу һаҡлау өсөн быяла көпшәләргә махсус контейнер һәм «самокол» тип исемләнгән шприц та баҫтырыла башлаған.
Заманса технологиялар ярҙамында 3-Д принтерҙар еңеүҙе яҡынайтырға ярҙам итә. Бындай бәләкәй цехтар тотош ил буйынса ойошторола башланы. Ирекмәндәр билдәләүенсә, маҡсат бер - дошманға етди ҡаршылыҡ күрһәтеү. Александр Кузьменкоға килгәндә, ул ябай эшҡыуар, айти-технологиялар менән ҡыҙыҡһына. Быға тиклем был ҡоролмала ул сувенир продукция етештерһә, хәҙер хәрби продукция күпләп баҫтырыла
Гөлназ Хәйбуллина
