Артур Фәрүәз улына 15 ноябрҙә 61 йәш тулған булыр ине. Генерал-лейтенанттың ҡәберенә сәскә һалыу сараһында яҡындары, дуҫтары һәм хеҙмәттәштәре Артур Әхмәтхановтың, ҡайҙа ғына эшләһә лә, коллегалары алдында һәр ваҡыт абруйы юғары булыуын билдәләне.
Офицер милиция хеҙмәткәренән алып Волга буйы федераль округының милли гвардия ғәскәрҙәре командующийы урынбаҫарына тиклем хеҙмәт юлын үтә. Төрлө йылдарҙа ул Башҡортостандың Юл хәрәкәте хәүефһеҙлеге дәүләт инспекцияһын, Йәмәғәт именлеге милицияһын етәкләй, Төньяҡ Осетия буйынса Эске эштәр министрлығы башлығы була. Артур Әхмәтханов айырыуса ауыр енәйәттәрҙе асыуҙа һәм хәүефле енәйәтселәрҙе ҡулға алыуҙа шәхсән ҡатнаша һәм юғары оҫталыҡ күрһәтә.
Артур Әхмәтханов республикала спортты үҫтереүгә лә күп көс һала. 17-19 ноябрҙә Өфөлә полиция генерал-лейтенанты иҫтәлегенә арналған милли көрәш буйынса Бөтә Рәсәй турниры үтәсәк. Унда илдең 24 төбәгенән 250 көрәшсе ҡатнашыр тип көтөлә.
