79 йылдан һуң награда геройҙың тыуған яғына ҡайтарылды. Ейәнсура районы Яңы Петровское ауылында Белоруссия ерендә һәләк булған Петр Фокиндың «Батырлыҡ өсөн» миҙалын туғандарына тапшырыу тантанаһы үтте. Награданы Радий Хәбировҡа Беларусь республикаһы Премьер-министры Роман Головченко тапшырғайны. Башҡортостан башлығы йыл аҙағына тиклем ҡыҙылармеецтың тыуған яғында яуҙа һәләк булғандар иҫтәлегенә һәйкәл асыласағын һәм миҙалдың фронтовиктың туғандарына биреләсәген белдергәйне.
Тиҫтә йылдар көтөлгән тантаналы мәл. «Батырлыҡ өсөн» миҙалы геройҙың вариҫтарына тапшырыла. Ошоға тиклем улар ҡаһарман туғандары тураһында бер ни ҙә белмәгән. Хәбәрһеҙ юғалған, ерләнгән урыны ла булмау йылдар буйы күңелде өйкәне, ти улар.
Яҡташыбыҙ наградаға 1942 йылда Новгород өлкәһендәге бәрелештәрҙә батырлыҡ күрһәткәне өсөн лайыҡ була. Тағы ике йылдан уҡсылар батальоны командиры Петр Фокин Белоруссияны фашистарҙан азат иткәндә вафат була.
Уның ҡалдыҡтары быйыл сентябрҙә Белоруссияның Витебск өлкәһендә эҙләү эштәре ваҡытында табыла. Ләкин Белоруссия ҡануниәте буйынса эҙәрмәндәргә табылған ҡомартҡыларҙы сығарыу тыйыла. Лейтенантың миҙалын Радий Хәбировҡа Беларусь Премьер-министры Роман Головченко Өфөгә эш сәфәре барышында тапшырҙы.
Әйткән һүҙ - атҡан уҡ. Ейәнсураның Яңы Петровское ауылында Бөйөк Ватан һуғышы ветерандарына арналған һәйкәл дә яңыртылды. Хәҙер ул ауылдың йәме, илһөйәрлек, хәтер үҙәге.
Ә инде хәҙер бер геройҙың ғына түгел, тотош илдең һынмаҫ рухы, ҡаһарманлығын сағылдырған миҙалды теләгән һәр кем күрә аласаҡ. Петр Фокиндың туғандары ҡомартҡыны республиканың хәрби дан музейына тапшырҙы.
Айнур Кәбиров
