Өфөнөң Нуғай ҡасабаһында йәшәйһегеҙме? Сатлама һыуыҡта электр энергияһын һаҡсыл тотоноғоҙ.
Атап әйткәндә, иҙәнде йылытыу системаһы, сауна һәм башҡа электр көсөргәнеше тыуҙырыусы приборҙарҙы ҡабыҙмау хәйерле. Сөнки уҙған йылдарҙағы хәл ҡабатланыуы ихтимал.
Өфөнөң Октябрьский районына ҡараған ҡасабала былтыр ҡыш тәүлек буйы электр уты һүнеп тороу күҙәтелде. Быға йорттарҙың электр менән йылытылыуы, төҙөүсе компанияларҙың бетондарҙы йылытыуы һәм башҡа төрлө сәбәптәр бар, ти электр селтәрҙәре компаниялары вәкилдәре. Мәктәптә ҡасабаны электр энергияһы менән тәьмин итеүсе компаниялар ҡатнашлығында йыйылыш үтте. Авария мәлендә урындағы халыҡ өсөн мәктәптә йылытыу пункты ойошторола.
Электр энергияһы менән көсөргәнеш, ғәҙәттә, ҡасабаның яңы биҫтәләрендә теркәлә. Йорттарҙың күбеһе зәңгәр яғыулыҡҡа тоташтырылмаған.
