Салауат ҡалаһынан Кормщиковтар ғаиләһен Владимир Путин «Ата-әсәлек даны» ордены миҙалы менән бүләкләне. Дүрт бала үҫтергән Кормщиковтарҙың йортонда БЮТ ижади төркөмө булды.
Иң мөһиме, тигеҙлек нөктәһен тойоу һәм шул саҡта һөҙөмтәле трюк килеп сыға. Акробатиканың һәр элементы спорт мастерына еңел бирелә. Ксения 4 йәшенән фигуралы шыуыу менән шөғөлләнгән өлкән апаһына тиңләшергә тырыша. Апаһы Виктория хәҙер үҙе балаларҙы өйрәтә. Спортты һәм юғары уҡыу йортоноң тарих факультетында уҡыуҙы берләштерә, инглиз, итальян, француз телдәрен өйрәнә. Китаптарҙы төп нөсхәлә уҡырға хыяллана.
Ғаиләлә һәр баланың яратҡан шөғөлө.Ксенияның игеҙәге Екатерина футболға ғашиҡ. Рәсәй беренселегендә ҡатнашыусы ҡыҙ спорттың был төрө ҡағиҙәләрен үҙләштерә. Уға эйәреп Матвей ҙа тупты оҫта тибергә өйрәнә.
Кистәрен ишле ғаилә бер өҫтәл артында йыйылырға күнеккән. Йортта шатлыҡлы һәм күңелле ауаздар тынмай.
Кормщиковтарҙың «Ата-әсәлек даны» ордены миҙалына лайыҡ булыуы тураһындағы указға ил Президенты Владимир Путин ҡул ҡуйған. Был абруйлы награда ғаилә институтын нығытыуҙа һәм балалар тәрбиәләүҙә ҙур ҡаҙаныштар өсөн бирелә.
Был йәһәттән Дмитрий һәм Наталья Кормщиковтар өлгө булып тора.
Рәмилә Исмәғилева
