Өфөнөң Киров районында Рәсәй ғәҙәттән тыш хәлдәр министрлығының Башҡортостан буйынса идаралығы һәм Өфө ҡалаһының янғындан һаҡлау идаралығы хеҙмәткәрҙәре профилактик рейдҡа сыҡты. Сатлама һыуыҡ шарттарында Хеҙмәт, Флот, Балалар урамдарында, Ялан тыҡрығында урынлашҡан йорттарҙа йөрөп, әңгәмәләр үткәрҙе.
Көндәр һыуытыу менән янғын осраҡтары арта, шуға күрә хәүефһеҙлек хаҡында иҫкәртеү көн талабы. Белгестәр йорт хужаларына мейестәрҙе дөрөҫ ҡулланыу ысулдарын аңлатты, электр линиялары һәм приборҙар төҙөклөгөнә иғтибар итте. «Һуғыш балалары», «Күп бала тәрбиәләүсе ғаилә» категорияһына ҡараған граждандарға янғынға ҡаршы иҫкәртеү ҡоролмалары бушлай тапшырылды.
