Сатлама һыуыҡта Иглин районы Яңы Ҡыбау ауылында йәшәүсе күп балалы ғаиләнең ҡаҙанлығы сафтан сыға. Һөҙөмтәлә сабыйҙарын яңғыҙ тәрбиәләүсе әсә йортон электр ҡоролмалары менән йылытырға мәжбүр була. Әммә изгелекле кешеләр ауыр хәлдә ҡалыусы ғаиләне ярҙамһыҙ ҡалдырмай.
Сатлама һыуыҡ күп балалы ғаиләгә мәшәҡәт өҫтәй, йорттағы торбалар туңа, ҡаҙанлыҡ сафтан сыға. Ярҙамға килгән сантехник ғаиләнең ауыр хәле тураһында таныштарына һөйләй. Бер нисә көндән ғаиләнең проблемаһы хәл ителә.
Кеше ҡайғыһына битараф булмаған Регина Ғәләүетдинова үҙе 4 бала әсәһе. Тормош иптәше үҙмәшғүллек менән шөғөлләнә. Оло улдары әрме сафында, бәләкәйҙәре мәктәпәт уҡый, балалар баҡсаһына йөрөй.
Яңы йылды ғаилә йылы йортта ҡаршылаясаҡ. Тылсымлы миҙгелдә һәр кем Ҡыш бабай кеүек йомарт булып, тирә-яҡтағыларға иғтибарлыраҡ булғанда, мөғжизәләр ҙә күберәк булыр ине.
Лилиә Мәҡсүтова
