Башҡортостан буйынса Ғәҙәттән тыш хәлдәр министрлығы республикала епшек ҡар яуыуы, урыны менән яуым-төшөмдөң көсәйеүе тураһында хәбәр итә. Айырым райондарҙа буран сығыуы, ағастарға һәм сымдарға ҡар һырыуы, юлдарҙа боҙлауыҡ булыуы ихтимал.
Бөгөн көн дауамында баш ҡала урамдары ҡарҙан таҙартылды. Техникалар колоннаһы, юлсылар, торлаҡ-коммуналь хужалыҡ хеҙмәткәрҙәре эшләне. Өфөнөң Совет районы биләмәһенә генә бөгөн ике тиҫтәгә яҡын берәмек техника йәлеп ителде. Юлсылар ҡар таҙартыуҙа тотҡарлыҡ яһамаҫ өсөн автоһәүәҫкәрҙәрҙе машиналарын тәғәйен урындарҙа ғына ҡалдырыуҙы һорай.
