Быйыл Башҡортостанда «Хәүефһеҙ һәм сифатлы юлдар» милли проекты сиктәрендә 209 километрҙан ашыу юл ремонтланған. Был уҙған йылға ҡарағанда 15 процентҡа күберәк. Ошо маҡсатҡа 10 миллиард ярым һумдан ашыу аҡса йүнәлтелгән, шул иҫәптән 6 миллиард ярымы федераль бюджеттан.
Транспорт һәм юл хужалығы министрлығында үткән матбуғат конференцияһында юл эштәрен башҡарыуға яҡынса йомғаҡ яһалды. Өфө һәм Стәрлетамаҡ агломерацияларында эш төбәк һәм муниципаль-ара әһәмиәттәге юлдарҙа башҡарылған. Шулай уҡ быйыл милли проект буйынса Бәләбәй, Ғафури, Иглин, Белорет, Ҡырмыҫҡалы, Ҡариҙел һәм Күгәрсен райондарында 7 күпер норматив хәлгә килтерелгән. Оҙонлоғо буйынса был 2022 йылға ҡарағанда ике тапҡыр тирәһенә күберәк.
