Изге башланғыс. Юғалған кешеләрҙе эҙләү буйынса Мәскәүҙәге үҙәк «Лиза Алерт» эҙләү отряды менән берлектә Башҡортостанда «Амулет» хәүефһеҙлек беләҙектәре проектын тормошҡа ашыра башлай. Улар хәүеф төркөмөндә булған граждандар, тәү сиратта, хәтер юғалтыуҙан яфаланыусылар, менталь үҙенсәлектәре булған балалар һәм өлкәндәргә тәғәйенләнгән. Тиҙҙән тәүге дүрт мең беләҙек Өфөгә килтерелә. Производствола финанс ярҙамды «Пятерочка» сауҙа селтәре күрһәткән. Һәр беләҙеккә махсус чип ҡуйылған, тышҡы яҡтан QR-коды бар. Ҡушымта аша кеше тураһында тейешле мәғлүмәт, шул иҫәптән бәйләнеш телефоны индерелә.
Беләҙек кешеләргә тиҙерәк өйөнә ҡайтырға ярҙам итәсәк. Проект авторҙары - Башҡортостан һаулыҡ һаҡлау министрлығы менән хеҙмәттәшлек итергә йыйына, ведомство мохтаждарҙы асыҡларға ярҙам итәсәк. Быға тиклем беләҙектәр Һамарҙа таратылған. Уҙған оператив кәңәшмә барышында республика башлығы Радий Хәбиров та төбәк кимәлендә проектты хупларға саҡырҙы.
