Буш ҡыуыҡтан ысынбарлыҡҡа. Булмаған төҙөлөштә торлаҡ һатып алып алданған бер төркөм өлөшсөләр ниһәйәт фатир асҡыстары алды. Был юлы төҙөлөп бөткән, рәсми ҡағыҙҙары булған квадрат метрҙар. Тулҡынландырғыс мәлде ҡайһы бер алданыусылар ике тиҫтә йылға яҡын көткән.
Ишекте аса алмай аҙапланыу Илфат өсөн хәҙер көлкө генә .Иң ауыр ҡаршылыҡтар үтелде инде, ти фатир хужаһы. Ә инде булған йоҙаҡҡа асҡыс яратыу бер ни түгел. Был көндө Гәрәевтар ғаиләһе тиҫтә йылдан ашыу көткән. Ошо ваҡыт эсендә йорт мөлкәте урынына ҡатлам- ҡатлам документтар, ялыуҙар һәм ғаризалар тупланған. Өмөт өҙөлдө генә тигәндә бәхет йылмая.
Торлаҡ төҙөлөшөнә аҡса индереп алданыусыларҙың бәләһен ил баш ҡалаһынан килгән «Садовое кольцо» компанияһы хәл итергә ярҙамлашҡан. Өфөлә төҙөгән йорттарының байтаҡ фатирҙары республика властары менән килешеү нигеҙендә тап өлөшсөләргә бирелә. Ошо рәүешле яҡын киләсәктә алданыусылар исемлегенә индерелгән бар граждандар ҙа үҙҙәренә тейеш квадрат метрҙарын йәки компенсация аласаҡ.
