«Хәлид бин Вәлид» мәсетенә Башҡортостан һәм илдең тағы ла бер нисә төбәгенән 40-тан ашыу йәш мосолман йыйылды. Бәйге тотоусыларҙың иң бәләкәйенә 5 йәш булған. Йәш Ҡөрьән хафиздар матур яңғырау, һүҙҙәрҙе дөрөҫ әйтеү кеүек бер нисә билдә буйынса баһаланған. Сара Башҡортостан мосолмандары Диниә назараты һәм урындағы халыҡ ярҙамында ойошторолған.
Бындай конкурс Стәрлетамаҡта беренсе тапҡыр үткәрелде. Ойоштороусылар бәйгене даими итмәксе. Ҡөрьән уҡыу буйынса конкурс йәш быуынға дини тәрбиә биреү, балаларҙа изге китапты уҡыу һәләтен камиллаштырыуҙы маҡсат итеп ҡуя. Сара аҙағында һәр бер ҡатнашыусыға бүләктәр таратылды. «Иң матур уҡыу», «Иң йәш ҡатнашыусы», «Йыл асышы» кеүек бер нисә номинацияла еңеүселәр билдәләнде. Ә беренсе урын яулаусы Радик Дәминдәровҡа 50 мең һумлыҡ бүләк тапшырылды.
