Исемлеккә индерелгән һайлаусыларҙың 83,73 проценты - 2 миллион ярымға яҡыны гражданлыҡ бурысын үтәгән. Башҡортостан Үҙәк һайлау комиссияһы мәғлүмәттәренә ярашлы, Владимир Путин 90,9 процент тауыш йыйған. Икенсе урында 3,69 процент менән КПРФ вәкиле Николай Харитонов килә, ә бына ЛДПР партияһынан Леонид Слуцкий өсөн һайлаусыларҙың 2,72 процент тауыш бирһә, «Яңы кешеләр»ҙән Владислав Даванков 1,88 процент йыйған.
Үҙәк һайлау комиссияһының ҡыҙыу линияһына граждандарҙан 179 шылтыратыу ҡабул ителгән. Улар башлыса мобиль һайлаусы, һайлау участкаһының эш ваҡыты кеүек мәғлүмәти һорауҙарҙы берләштергән. Өс көн дауам иткән һайлауҙа граждандар 15 мартта әүҙем тауыш биргән, тәүге көндә 36 процент кеше гражданлыҡ бурысын үтәгән. Район-ҡалаларҙың әүҙемлегенә килгәндә Благовар, Бүздәк, Тәтешле, Илеш, Мәсетле, Ғафури, Шаран, Федоровка, Көйөргәҙе, Балтас, Асҡын райондарында йәшәгән халыҡтың 90 проценты тауыш биргән.
