Бәләкәй ашнаҡсы, парикмахер һәм табиптар. Өфөлә 5 йәштән 7 йәшкә тиклемге кескәйҙәр араһында «Абилимпикс» фестивале үтте. Унда һаулыҡ мөмкинлектәре сикләнгән малай-ҡыҙҙар төрлө компетенцияла көс һынашты. Бәйге барышын БЮТ хәбәрсеһе Рәзилә Ғиниәтуллина күҙәтте.
Бәләкәй Арыҫлан винегреттың бер нисө төрөн әҙерләй белә. Ашнаҡсы эшенә үҙаллы өйрәнгән. Иң ҡатмарлыһы - кишер, картуф, сөгөлдөрҙө ваҡ, бер ҙурлыҡта итеп турау, ти. Малай өсөн бешеренеү - тик хобби ғына. Киләсәктә иһә башҡа һөнәрҙе һайламаҡсы.
Ә был майҙанда бәләкәй парикмахерҙар көс һынаша. Сәс оҫталары алдында киске прическа эшләү бурысы тора ине. Еңеүсе итеп иң зауыҡлы эш авторы һайлана, шуға ла ҡыҙҙар прическаларҙы төрлө сәс ҡыҫтырғыстар менән биҙәне. Етди бәйгегә алдан уҡ әҙерләнгәндәр.
Аптечканы дөрөҫ кәрәк-яраҡтар менән тултырыу, йәрәхәтләнеүсенең ҡулын бинт менән бәйләү һәм һорауҙарға дөрөҫ яуап биреү. Бәләкәй табиптар алдында торған бурыстар ошолар ине. Йәмғеһе фестивалдә ҡатнашыусылар 4 компетенцияла ярышты.
«Абилимпикс» фестивале бәләкәй оҫталар араһында тәүгә ойошторола. Еңеүселәр Башҡортостан данын федераль кимәлдә яҡлясаҡ. Быйыл бәйге тик баш ҡалала йәшәүселәр араһында үтте. Киләһе йылда ойоштороусылар башҡа райондарға ла сыҡмаҡсы.
Рәзилә Ғиниәтуллина
