Тәүлек эсендә республиканың 112 системаһы шылтыратыуҙарҙы эшкәртеү үҙәгенә һыу баҫыу тураһында 8 хәбәр килгән. Тәүлек эсендә Нуриман районында Өфө йылғаһы 44 сантиметрға артҡан. Мәләүез янында Ағиҙел йылғаһында һыу 36 сантиметрға күтәрелгән. Рәсәй Ғәҙәттән тыш хәлдәр министрлығының Башҡортостан буйынса баш идаралығы һыу баҫыуға бәйле 26 хәлде контролдә тота. Һүҙ 450 йорт алды ихатаһы, баҡса участкалары,,шулай уҡ юлдар һәм бәләкәй күперҙәр тураһында бара. Йомағужа һәм Павловка һыуһаҡлағыстары һыу тултырыу режимында эшләй. Нөгөштә һыу ташлау эштәре башҡарыла.
Һуңғы мәғлүмәттәргә ярашлы, Күгәрсен районында Оло Эйек йылғаһы Кузьминовка ауылы эргәһендә ярҙарынан сығып, баҡсаларҙы һыу баҫҡан. Мораҡ ауылында Наҙлыйылға ҡушылдыҡтары арҡаһында Титов, Матросов урамдарының бер өлөшөн һыу баҫҡан. Оло Эйек йылғаһы тамағында урынлашҡан Үрге Мөрсәләйҙә әлеге ваҡытта һыу кимәленең күтәрелеүе күҙәтелә. Һыуҙың иң юғары нөктәһе әлегә үтелмәгән. Урында республиканың ғәҙәттән тыш хәлдәр буйынса дәүләт комитеты хеҙмәткәрҙәре дежурҙа тора.
