Биләмәләрҙе социаль-иҡтисади йәһәттән үҫтереүҙең көнүҙәк мәсьәләләре. Бөгөн Башҡортостан башлығы Радий Хәбиров Шишмә районында ҡала һәм ауыл биләмәләре башлыҡтары менән зональ семинар-кәңәшмә үткәрҙе.
Осрашыуға 13 муниципалитет вәкилдәре саҡырылды. Төбәк етәксеһе үҙ сығышында 2023 йылғы зона кәңәшмәләре йомғаҡтары буйынса йөкләмәләрҙе тормошҡа ашырыу тураһында һөйләне. Мәҫәлән, «Яҡты урам» республика программаһын финанслау 200 миллиондан 300 миллион һумға тиклем арттырылған. Муниципалитет башлыҡтары шулай уҡ хәҙер автоном янғынды иҫкәртеү ҡоролмаһына мохтаж булған кешеләрҙең өҫтәмә исемлеген үҙҙәре төҙөй ала. Ҡала һәм ауыл биләмәләре «ТКО-Башҡортостан» дәүләт мәғлүмәт системаһына инеү мөмкинлегенә эйә. «Айыҡ ауыл» конкурсында призлы урындар һаны ла артҡан. Быйылдан конкурста еңеүсе булмаған ҡатнашыусылар ауыл биләмәләрен төҙөкләндереүгә премия рәүешендә 200-шәр мең һум аҡса аласаҡ. Былтыр яңғыраған тәҡдимдәрҙе ғәмәлгә ашырыу буйынса эш бының менән генә сикләнмәй. Әгәр беҙ нимәлер тураһында һөйләшәбеҙ икән, уны мотлаҡ үтәргә кәрәк, тине Башҡортостан башлығы.
Башҡортостан башлығы яҡын киләсәккә урындағы үҙидара органдары алдында торған төп бурыстарҙы билдәләне. Иң элек был махсус хәрби операцияла ҡатнашыусыларға һәм уларҙың ғаилә ағзаларына ярҙам итеү, иҡтисадтың һәм социаль өлкәнең тотороҡло үҫешен тәьмин итеүгә ҡайтып ҡала. Радий Хәбиров шулай уҡ 2024 йылдың мөһим сәйәси ваҡиғалары - Башҡортостан башлығын һәм урындағы үҙидараның вәкәләтле органдары депутаттарын һайлау тураһында һөйләне.
