Өфө дәүләт нефть техник университетында диплом тапшырылды

Нефть һәм газ сәнәғәтенә яңы кадрҙар. Быйыл Өфө дәүләт нефть техник университеты меңдән ашыу белгес сығара. Серго Орджоникидзе исемендәге мәҙәниәт һарайында торба үткәргес транспорты факультетын тамамлаусыларға диплом тапшырылды. Был йүнәлеш буйынса 145 бакалавр һәм 150 магистр әҙерләнгән. Уларҙың бер өлөшө уҡыу программаларын тулыһынса инглиз телендә үҙләштергән.

Торба үткәргес транспорты факультеты тиҙ үҫешә. Бер нисә йыл инде унда «нефть һәм газ транспортында һанлы технологиялар» буйынса яңы мәғариф программаһы уңышлы тормошҡа ашырыла. Был йүнәлеш йәштәр араһында ҙур ихтыяж менән файҙалана.

Олег Баулин, Өфө дәүләт нефть техник университеты ректоры

Торба үткәргес транспорты факультетында нефть, газ, йылылыҡ энергетикаһы өлкәләре өсөн киң профилле белгестәр әҙерләнә. Йәштәрҙе эре сәнәғәт предприятиелары етәкселәре тәбрикләп, эшкә лә саҡырҙы. Кадрҙарға ихтыяж юғары.

Бөгөн илдең нефть һәм газ тармағын үҫтереү буйынса мөһим стратегик ҡарарҙар ҡабул ителә. Зәңгәр яғыулыҡ үткәреү, газ транспорты системаһын реконструкциялау, нефть һәм газ химияһы буйынса күләмле проекттар тормошҡа ашырыла. Бар өлкәләргә лә белгестәр талап ителә. «Диагностика» һәм «Һанлаштырыу» кеүек яңы йүнәлештәр буйынса кадрҙар әҙерләнә башланы.

Шамил Шәрипов, Дәүләт Йыйылышы - Ҡоролтай депутаты, «Газпром Трансгаз Өфө» яуаплылығы сикләнгән йәмғиәте генераль директоры
Башбат
Нет наркотикам
Волна
БАШКОРТТАР-БСТ