Бөгөн Башҡортостан Һаулыҡ һаҡлау министры Айрат Рәхмәтуллин ошо турала социаль селтәрҙәге сәхифәһендә яҙған. “Ҡыҙҙар һәм малайҙар йышыраҡ велосипед, самокат һәм роликтарҙа йөрөгәндә, батутта һикергәндә имгәнә. Уларҙың аяҡ-ҡулдары, умыртҡа бағанаһы һына, мейе һелкенә. Электр самокаттар һайлаусылар ауыр имгәнеүҙәр ала. Аҙна һайын балалар травмпункттары 4-5 пациентты дауаханаға ебәрә. Уларға ауыр операция яһарға, тимер конструкциялар ҡуйырға тура килә”, - тип яҙған ведомство башлығы. “Иғтибарлы һәм һаҡ булыу йәрәхәттәрҙе иҫкәртеүҙең ышаныслы юлы. Ата-әсәләр балаларға өлгө күрһәтергә, уларға юл ҡағиҙәләрен өйрәтергә тейеш", - тигән министр.
