Ижади төркөм бөгөн эшкә тотонорға ниәтләй. Хәрби-патриотик картина тормошта булған ысын ваҡиғаларға нигеҙләнә һәм тыл геройҙарына арнала. Фильмдың сценарий авторы журналист һәм драматург Баныу Ҡаһарманова. “Учалы районынан йәйәү һыйыр көтөүен оҙатып барыусы үҫмерҙәрҙең батырлығын һүрәтләнем. Уларға 2 мең километр юл үтергә тура килә. Ҡаһарманлыҡ күрһәткән кешеләргә рухи һәйкәл ҡуйырға теләнем”, - ти ижадсы.
Фильмды төшөрөү өсөн “Башҡортостан” киностудияһында ҙур хромакей павильоны булдырылған. Картинаның продюсеры Леонид Филинов һөйләй.
Леонид Филинов белдереүенсә, “Фәрзәнә көнбайышҡа бара” фильмы сәғәт ярымлыҡ булырға тейеш. Еңеүҙең 80 йыллығына арналған кино премьераһын киләһе йылдың майында тәҡдим итеү ҡарала.
