Баш ҡалала илдең иң абруйлы хирургтары операция яһаны. Улар башҡарған әмәлиәт тотош илгә трансляцияланды. Оҫталыҡ дәрестәрен ете йөҙҙән ашыу медицина учреждениеһы белгестәре ҡараны.
Пациенттың ашҡаҙан аҫты биҙенә операция яһала. Скальпель Мәскәүҙең штаттан тыш баш онкологы, профессор, медицина фәндәре докторы, академик Игорь Хатьков ҡулында. Хәйер скальпель хәҙер образлы ғына әйтелә. Хирургтарҙың ҡулында юғары технологиялы ҡорамалдар. Яман шеш тә лапроскопия, йәғни бәләкәй генә тишектәр ярҙамында ҡырҡып алынасаҡ.
Ошондай уҡ юғары технологиялы операциялар бер юлы биш бүлмәлә уҙғарылды. Хирургтар аш юлы, ашҡаҙан, тура эсәк онкологияһына әмәлиәт уҙғарҙы. Уларҙың барышын тотош ил табиптары күҙәтә алды. Республика клиник онкология диспансерында тотош илгә тура трансляция ойошторолдо. Бәйләнештең теге осондағылар аңлашылмаған мәлдәрҙе шунда уҡ асыҡлай алды.
Яман шеш ауырыуҙары йылдан -йыл йәшәрә һәм киҫкенләшә бара. Шуға ла онкология өлкәһе һәр саҡ үҫеш юлында булыуы шарт. Өфөлә уҙғарылған конференция ла һөнәр камиллаштырыу, тәжрибә уртаҡлашыу йәһәтенән абруйлы майҙансыҡ.
Яман шеш ауырыуҙарына арналған форумға илдең төрлө төбәктәренән 250 белгес килде. Ете йөҙҙән ашыу табип сарала онлайн режимда ҡатнашты.
Айнур Кәбиров
