Пациентҡа хәрәкәтләнеү мөмкинлеген ҡайтарыу. Өфөнөң 21-се ҡала клиник дауаханаһы табиб-нейрохирургы, медицина фәндәре кандидаты Артемий Новиков арҡа мейеһенә әмәлиәт яһап, ауырыуҙың йәшәү кимәлен бер-нисә кимәлгә еңеләйтергә ярҙам иткән. Ваҡытында сифатлы медицина ярҙамы алған пациент һәм уның һаулығы һағында тороусылар менән БЮТ ижади төркөмө аралашты. Был хаҡта ентекләберәк БЮТ хәбәрсеһе Гүзәл Борханова яҙмаһында.
Магнит-резонанс томографияһында пациенттың әмәлиәткә хәтлем һәм унан һуңғы хәлендә айырма ҙур. Тәүгеһендә 5х2, 5х1 сантимерлыҡ шеш. Тап был шеш уның һаулығын ҡаҡшата, аяҡтары йөрөмәй башлай, таз һөйәге янындағы органдар эшмәкәрлегәнә кире тәьҫир итә.
Йәш ирҙә асыҡ формала туберкулез булыу сәбәпле, әмәлиәтте туберкулезға ҡаршы республика клиник диспансерында яһайҙар. Операцияны Өфөнөң 21-се клиник дауаханаһы табиб-нейрохирургы Артемий Новиков етәкселегендәге хирургтар бригадаһы яһай.
Пациент әлеге ваҡытта оҙайлы реабилитация үтә. Махсус инструктор ярҙамында дауалау физкультураһы менән дә шөғөлләнә. Аяҡтары күнекмәнән-күнекмәгә яҡшыраҡ хәрәкәтләнә, дауаланыусы үҙен көндән-көн яҡшыраҡ һәм ышаныслыраҡ тоя, ти белгестәр.
Туберкулезға ҡаршы республика клиник диспансерында йылына 35-ләгән пациентта умыртҡа бағанаһы сире асыҡлана. Уларҙың ике тиҫтәнән ашыуына юғары технологиялы медицина ярҙамы күрһәтелә. Әбйәлил районынан бында реабилетация үткән пациент та нығынып, бер-нисә айҙан тыуған яҡтарына үҙ аяҡтарында ҡайтырға иҫәп тота.
Гүзәл Борханова
